Preity Zinta Turns 51: Army Discipline Se Bollywood Stardom Tak, Ek Strong Aur Inspiring Journey

 Preity Zinta Turns 51: Army Discipline Se Bollywood Stardom Tak, Ek Strong Aur Inspiring Journey

photo credit - Preity Zinta  Article By Sunny

Bollywood ki bubbly aur strong-willed actress Preity Zinta aaj 51 saal ki ho chuki hain. Film ‘Dil Se’ se career start karne wali Preity ne Dil Chahta Hai, Kal Ho Naa Ho, Koi… Mil Gaya, Veer-Zaara, Kabhi Alvida Naa Kehna jaise iconic films se apni alag pehchaan banai. Aaj unke birthday ke mauke par, unki life ke kuch kam-known, emotional aur inspiring chapters par ek nazar daalte hain.

Preity ka janm ek Rajput family mein hua tha. Unke father Durganand Zinta Indian Army mein officer the. Bachpan se hi army discipline ne unki personality ko strong aur fearless banaya. Lekin jab Preity sirf 13 saal ki thi, tab ek car accident mein unke father ka dehant ho gaya. Usi accident mein unki mother Nilprabha bhi thi. Unki jaan bach gayi, lekin unke body ki lagbhag har haddi, yahan tak ki spine bhi fracture ho gayi thi. Wo kareeb ek saal tak bed par rahi.

Simi Garewal ke show mein Preity ne bataya tha ki accident se kuch din pehle unhe ajeeb sa feeling aa raha tha. Wo school mein daily newspaper padhti thi aur ek din apni friend Shagun se boli thi ki shayad unhe apne father se judi koi buri news padhne ko milegi. Tab friend ne mazaak mein kaha tha, “Tum pagal ho.”
Jab accident hua, Preity school mein thi. Ek nun unhe uthane aayi aur pyaar se kaha ki unhe kahin jaana hai. Hospital le jaaya gaya jahan unhone apni maa ko stretcher par unconscious dekha. Father ke baare mein kisi ne kuch nahi bataya. Agle din school mein unhe parlour mein bithaya gaya, aur wahi newspaper mein unhone apne father ki death ki news padhi.

Preity ne bataya tha ki is incident par unhone mahino tak react nahi kiya. Lagbhag 6 mahine tak wo royi bhi nahi, kyunki unhone apne father ka body dekha hi nahi tha. Phir ek raat neend mein achanak unki cheekh nikal gayi aur saara dard aansuon ke saath bahar aa gaya.

Unke father hamesha equality par believe karte the. Wo kehte the, “Beti ko weak bana kar mat paalo.” Agar beta bag uthata tha, to beti bhi uthati thi. Agar beti cooking seekhti thi, to beta bhi seekhta tha. Ye values Preity ki life ka strong base ban gayi.

Bhai Ko Patthar Maar Diya Tha 😅

Preity bachpan se hi kaafi fearless aur mischievous thi. Ek baar unka apne bade bhai se jhagda ho gaya. Gusse mein unhone patthar utha kar bhai ke sir par maar diya. Bhai rone laga. Tab Preity ko papa ki baat yaad aayi: “Rajput rote nahi hain.”
Unhone bhai ko thappad maar ke bola, “Tum Rajput nahi ho kya? Rona band karo!”
Bhai ke sir se khoon nikal raha tha. Maa aa gayi. Preity dar ke maare table ke neeche chhup gayi aur poori raat wahin so gayi. Ghar walon ko laga wo bhaag gayi hai, police tak bula li. Subah safai wali bai ne bataya ki Preity to table ke neeche so rahi thi.

Bina Book Ke English Mein Top Kiya

Preity ki maa ne show ‘Jeena Isi Ka Naam Hai’ mein bataya tha ki Preity school mein achha padhti thi, lekin ghar aakar books kam kholti thi. 10th ke English exam se ek din pehle pata chala ki Preity ke paas English ki book hi nahi hai. Maa ghabra kar market se book le aayi.
Result aaya aur sab shock ho gaye — Preity ne poore Himachal Pradesh mein English mein first rank liya.

School ke baad Preity ne Shimla ke St. Bede’s College se English Honors kiya, phir Psychology aur Criminal Psychology padhi. Acting unka plan nahi tha, lekin destiny kuch aur hi chahti thi.

Aise Shuru Hua Career

1996 mein Preity apne friend ki birthday party mein gayi thi. Wahan unki mulaqat ad filmmaker Kunal se hui. Unhe Preity ki personality itni pasand aayi ki 2 din baad call karke bola, “Maine ek chocolate ad tumhe soch kar likha hai.”
Audition ke din wahan 50 ladkiyan khadi thi. Preity nervous ho gayi, lekin unhone sirf 2 lines boli aur unka selection ho gaya. Ye tha Perk chocolate ad. Uske baad Liril ad ne unhe pehchaan dilayi.

Films Mein Entry

Preity ki pehli release film thi Mani Ratnam ki ‘Dil Se’. Role chhota tha, lekin performance notice hui. Baad mein wo ‘Soldier’ mein lead role mein nazar aayi.

Saroj Khan Ki Daant Aur Real Passion

Film ‘Kya Kehna’ ke shoot ke time ek song mein Preity sahi se lip-sync nahi kar pa rahi thi. Choreographer Saroj Khan gussa ho gayi aur unhe daant diya. Preity ne kaha tha, “Us din mujhe pehli baar samjha ki acting mera real passion hai.”

Underworld Ke Khilaaf Gawahi

2003 mein Preity ne underworld ke khilaaf court mein statement dekar sabko surprise kar diya. Ye case film Chori Chori Chupke Chupke ke financier Bharat Shah se juda tha, jinke underworld links bataye gaye the. Preity ko ₹50 lakh extortion threat mila tha.
Salman Khan aur Shah Rukh Khan jaise stars bhi witnesses the, lekin baad mein sab palat gaye. Sirf Preity Zinta hi thi jo apne statement par court mein tikki rahi. Iske baad unhe 2 mahine witness protection mein rakha gaya. Unki bravery ke liye unhe ‘Mind of Steel Award’ mila.

Personal Life, Kids Aur IPL

Preity ne 2016 mein American businessman Gene Goodenough se shaadi ki. Ab wo Los Angeles mein rehti hain. 2021 mein surrogacy ke through wo twins ki maa bani. Acting ke saath-saath wo IPL team Punjab Kings ki co-owner bhi hain.

₹600 Crore Ka Offer Thukra Diya

Filmmaker Shandaar Amrohi ne 2011 mein announce kiya tha ki wo apni ₹600 crore ki property Preity ke naam kar denge. Lekin Preity ne ye offer clearly reject kar diya, aur kaha ki unhe kisi aur ki property nahi chahiye.

Burqa Pehen Kar Dabangg Dekhne Gayi

Preity ne bataya tha ki Dabangg release ke time wo burqa pehen kar Gaiety Galaxy theatre gayi thi audience reaction dekhne. Wahan wo Salman Khan ke scenes par baaki logon ke saath seetiyaan bhi baja rahi thi 

Next Film: Lahore 1947

Preity jald hi Sunny Deol ke saath film ‘Lahore 1947’ mein nazar aayengi. Isse Rajkumar Santoshi direct kar rahe hain aur Aamir Khan produce kar rahe hain. Film 2026 mein release ho sakti hai. Saath hi khabar hai ki unhe Sanjay Leela Bhansali ki Heeramandi Season 2 mein bhi role mil sakta hai.